الرئيسية / ارشيف الطليعة / لا مصر اتعرت ولا اتحرقت يا إعلام العار

لا مصر اتعرت ولا اتحرقت يا إعلام العار

وائل الشهاوي بطل من ذهب

بقلم / وائل الشهاوى

كلمتين و بس .. في شمال سينا عساكر وضباط وافراد .. جيش وشرطه .. في مدرعه او كمين في الطل اسقع من الفريزر وفي الصيف اسخن من الفرن..واكل معلبات ماينفعش يتسخن وفي الصيف المياه مغلية .. وعيش بقاله ساعه طالع من الفرن..تحس ان بقاله اسبوع ..

                 

وماحدش بياخد باله من الكلام ده .. لانك مشغول بقذيفة هاون معديه .. او لان البديل اللي حييجي مكانك في الكمين اتأخر بسبب عبوه انفجرت جابت اجل المدرعه اللي فيها القوه البديله.. وعمال تفكر مين من زمايلك كان في المدرعه .. وعاش ولا مات .. وحتقول ايه لاهله لما يسألوك..وفي وسط كل ده تلاقي اللي جنبك جاتله طلقة قناصه ..

 

تمسك سلاحك وتلبس خوذتك وتبتدي تمشط بعينيك وبطلقاتك ..

 

ولما ربنا يكرمك وتروح لو رجعت الاستراحه طبعا مش لا قدر الله المستشفي او المشرحه .. تلاقي ضهرك مموتك من الصديري الواقي ابو 18 كيلو وكتفك اتخلع من قايش السلاح .. مناخيرك مقفوله من البارود.. وقلبك بيعيط علي العسكري الاسمر اللي مات جنبك ..

 

تصلي العشا وتمدد ضهرك وتمسك تليفونك علشان تبعت لاهلك رساله ان كله تمام والدنيا أمان .. تلاقي اخبار مسلسلات رمضان واخبار الهري المعتاده .. ومصطلح مصر اتحرقت .. مصر ايه اللي اتحرقت واحنا هنا نطفي كل نار بدمنا؟؟

 

وتعبير مستفز تاني مصر اتعرت .. مبالغات واستفزاز .. وواحدة منزله بوست انتوا بتذلونا بانكم بتموتوا ماهي شغلتكم …. تبقي عايز ترد تقول يا اخي ( ………………) . بس ما بتعلقش..

بتفتكر ان الموت كل يوم عايش معاك ……

 

تستغفر . وتنام علشان الذنوب .

 

 

 

 

 

المقال يعبر عن رأي الكاتب ولايعبر بالضرورة عن رأي الطليعة نيوز

شاهد أيضاً

وإن عدتم عدنا.. عن كشك الفتوى

كتب : عادل نعمان   المسئولون عن مترو الأنفاق تصرفوا فيه، وكأنه عزبة ورثوها كابراً …